Presidente República, José Ramos Horta informa katak FALINTIL-Forca Defesa de Timor Lete (F-FDLT) hanesan ema ne'ebé kaer kilat no tau farda estadu ni'an, tenki primeiru lugar hatene direitus humanus para bele respeita ema seluk nia direitu.

"Sira (F-FDTL) tenki hetan disiplina didiak para labele ho autoridade ne'ebé sira iha hanesan kilat ne'ebé sira kaer, sira duni mak viola fali lei no direitu humanus. Nune'e, importante tebes atu hatene ho diak oin-sa atu respeitu direitu ema moris nian", dehan Horta bainhira halo nia diskursu iha Seremonia abertura ba FALINTIL Human Right Workshop ne'ebé organiza husi Ministeriu Defesa ICRC no UNMIT durante loron rua iha Quartel Geral F-FDTL Tasi Tolu Dili, Tersa (03/07).

Horta esplika katak, Timor Leste desde 2002, ratifika tiha ona konvensaun hitu ne'ebe iha relasaun boot ho direitu ema ni'an. Nune'e Governo Timor Leste presiza esforsu makas atu dudu programa direitu humanus sai interese sosiadade ema Timor tomak. Horta mós esplika tan katak, programa direitu humanu tenki sai hanesan kurikulum ida hahu kedas husi eskola infantil, primaria, pre-secundari to'o universidade. Nune'e, iha tinan hirak tuir mai, Direiru humanus hola parte ona hanesan vida no kultura ida iha ema Timor nia moris.

"Purtantu, hau hanoin serve door estadu sira divia halo kursu kona ba direitus humanus no Nasoens Unidas simu diak hau nia ideai atu loke kurikulum ba eskola nian, nune'e labarik oan sira, hahu kedas hosiinfantil to'o universidade atu bele apriende direitu humanus. Nune'e loron ikus mai, direitus humanos sei hola parte iha kultura ema Timor nian", dehan Horta.

lha fatin hanesan, Athul Kahre nudar representante SRSG UNMIT, iha nia deskursu hateten katak, F-FDTL presiza tebes atu hatene direitus humanus hodi hala'o nia funsaun hanesan forsa profesional ne'ebe respeita ema nia moris no vida sivil sira ni'an. lha nia deskursu, ne'ebe mós impresta liafuan husi eis Sekretariu Geral Nasaun Unidos Cofi Annan, hateten, "Ita sei haksolok ho liberdade bainhira iha seguransa. Ita mós sei haksolok ho seguransa bainhira iha liberdade. Maibe buat rua ne'e halo ita la haksolok hotu bainhira laiha respeitu ba direitus humanu", dehan Athul Kahre. Nune'e, nia hatutan katak, UNMIT liman nakloke nafatin atu ajuda Governo Timor, liu-liu atu hare hamutuk oin-sa bele dezenvolve nafatin area direitu humanus iha Timor Leste.

Partisipa iha seremonia abertura ne'e mak hanesan, Presidente da Republica, Birgadeiro General Taur Matan Ruak, Athul Kahre SRSG UNMIT, atase militar husi nasaun amigo sira, Membro offisial F-FDTL nian, Komandante PNTL, membros Governo no representante sosiadede sivil. (dj/nc)