Presidente da Republica, DR. Jose Ramos horta informa katak, planu Forca 2020 importante tebes ba Timor Leste, atu dezenvolve no kontrola nia area defesa no seguransa. Komentariu ida ne'e hato'o relasiona ho reasaun publik internasional kona ba planu Governo Timor Leste atu dezenvolve Forca 2020.

"Forca 2020 laos deit, atu hola ro-ahi funu ou aviaun-funu, maibe planu ida atu dezenvolve F-FDTL sai forca professional hodi kontrola defesa no seguransa soberania Timor Leste ninian", dehan Horta bainhira partisipa iha seremonia abertura Workshop Direitos Humanos ba Official F-FDTL sira iha Quartel Geral Tasi Tolu, ne'ebe organiza husi Ministerio Defesa, ICRC no UNMIT, Tersa (03/07).

Horta esplika katak, reasaun internasional ne'e Ia baseia ba faktus no planu ne'ebe iha. Forca 2020 planu ida atu dezenvolve kapasidade no rekursu forca F-FDTL. Nune'e forsa ne'e bele fo siguransa diak ba area tasi, rai no riku soin ne'ebe mak iha. Nune'e mós atu forsa ida ne'e bela hala'o nia funsaun ho diak, liu-liu atu garantia estabilidade, integridade, liberdade tuir Konstituisaun haruka.

"Ita presiza ro-ahi funu atu kontrola ita nia riku soin iha tasi ho diak. Nune'e ema labele na'ok no atrai riku soin iha tasi laran ne'eba. Nune'e mós ita presiza materail sira seluk, inklui mós aviaun-funu atu kontrola ita nia rai-maran no airo ho diak. Nune'e, Forca 2020 hanesan planu ida atu haforti no haforsa interese hirak ne'e", haktuir Horta. Nia mós hatutan tan katak, Planu Forca 2020 sei la sai ameasa ba nasaun ida tamba nia fiar katak funu konvensional la iha ona.

Maski nune'e, Horta afirma tan katak, Governo no Estado Timor Leste tengki prepara-an hodi hasoru funu non-konvesional ne'ebe sei mosu mai, liu-liu funu hasoru krime internasional, terorisme, merkadu ilegais no inimigo sira seluk tan. Atu hasoru buat hirak ne'e hotu, Timor Leste presiza iha forca profesional idas ne'ebe preparadu atu bele atende. Bazesia nesidade hirak ne'e, Forca 2020 hanesan programa ida, laos deft atu dezenvolve forca F-FDTL maibe hare liu-liu ba interese Timor Leste nian iha area defesa no siguransa ba nia soberania no teritoria Timor Leste tomak.

Hatan ba prekupasaun governo Australia, liu-liu komentariu husi Ministro Negosiu Estrageiru Alexander Downer nian ba Planu F2020, ho diplomasia Horta hateten katak, Australia ho Timor Leste belun nafatin, maibe presiza tebes relasaun diak liu tan, atu rai rua ne'e bele kompriende interese nasaun ida -idak nian. (nc/dj)