Dili, STL, Tersa 02-10-2007

Dili, Falintil-Forsa Defeza Timor-Leste(F-FDTL), hametin amizade ho forsa marina França liu hosi futebol. Vizita forsa França ne’e halo tinan-tinan ho ro-ahi funu no sira aproveita tempu halao divertimentu ho F-FDTL.

“Dadaun ne’e (Forsa França-Red) dala ida tan hanesan tinan-tinan mai vizita Timor no aproveita vizita ida ne’e sira mai halo hiburan uitoan ho F-FDTL sira iha ne’e,” informa komandante f-FDTL, Brigadeiru Jeneral Taur Matan Ruak ba jornalista iha Taci-Tolu, Dili, Segunda-feira(1/10).

Iha agenda importante rua maka forsa parte rua ne’e halo, hanesan futebol no lori membru marina F-FDTL ba vizita ro-ahi funu França ho numeru F732, koris malahuk nebe para iha Ponte Caes, Dili. Vizita ne’e laiha apoio ba instituisaun F-FDTL.

Taur mos espera katak ho espiritu vizita ida ne’e bele lori situasaun hakmatek ba povu iha Timor Leste nia laran tomak. Oras ne’e F-FDTL halao servisu hanesan bai-bain, nebe fo terinu formasaun servisu operasaun nian. Nudar nasaun foun nebe sei moris sabraut maibe sei hadia neneik para bele sai diak hanesan rai seluk iha mundu.