Dili, STL, Tersa 02-10-2007

Passarevista ne’e rasik forsa Australiano sira halao derepenti deit iha Estrada Aitarak laran iha loja Malilait nia oin. Tuir observasaun jornalista Timor Post nia hare, Forsa Australiano sira uza kareta militar ida nian no pajero ida haleu tiha Toyota ne’e uza kilat bo’ot hodi haruka membrus F-FDTL tur iha kareta laran haruka tun husi kareta laran hodi Forsa Australia sira halo passarevista ba kareta nebe sira uza.

Iha passarevista ida ne’e, Forsa Australiano sira lahetan kilat ka buat kroat ruma iha kareta laran. Basa maske membrus F-FDTL sira ne’e halao hela servisu maibe sira la uza kilat no buat kroat ruma iha kreta laran, maibe sira uza farda F-FDTL kompletu.

Husi passarevista ne’e rasik, halao quaze minutu 15 nia laran. Tuir observasaun mos hare katak, Forsa Australia sira halao passarevista tanba deskunfia hanoin katak ema sivil uza kareta ne’e karik hodi kilat ka buat kroat ruma.

Membrus F-FDTL sira satiadu.

Entertantu, membrus F-FDTL sira nebe mak hetan passarevista husi Forsa Australia, senti la satisfeitu no satiadu hodi hirus ho atuasaun Forsa Australiano nebe halo fali passarevista ba kareta nebe sira uza.

Tuir kondutor membru F-FDTL nebe hodi kareta ne’e hateten katak, tanba saida mak Forsa australiano halao operasaun uza kareta sivil, nusa F-FDTL halao servisu uza kareta sivil, nusa F-FDTL halao servisu uza kareta sivil labele fail. “Ah, tanba saida mak sira (Forsa Australia Red) uza kareta sivil bele, nusa maka ita (F-FDTL Red) labele fali?” dehan membrus F-FDTL ne’e hodi koalia ba Forsa Australiano.

Observasaun mos hare katak, hahalok Forsa Australiano ne’e konsege halo soldadu F-FDTL balun konsidera hahalok Forsa Australiano ne’e lalos, tanba maske sira hare ona katak soldadu F-FDTL hatais farda kompletu maibe Forsa Australiano sira konsege halao nafatin passarevista ba sira nia kareta.

Problema ida ne’e rasik konsege rsezolve diak tanba bainhira vice komandante Interino Policia Militar (PM), Abel Ximenes mai halao negosiasaun ho Forsa Australiano sira hodi haruka Forsa Australia sira hapara passarevista ne’e. (TP)