Dili, STL, Kuarta 11-10-2007

Dili – Chefe Estadu Maior General Falintil-FDTL, Taur Matan Ruak hateten, soldadu F-FDTL nebe halao seguransa iha parte Leste, li-liu distritu Baucau retira tiha ona, tanba situasaun iha neba normal fila fali ona. Oras ne’e pozisaun F-FDTL mantein nafatin iha distritu Lautem no Viqueque.

Taur hato’o kestaun ne’e ba jornalista, Kuarta (10/10) hafoin halao enkontru semanal ho Prezidente Republika José Ramos Horta, iha Palacios das Cinzas, Kaikoli, Dili.

Nia esplika katak retira husi situasaun nebe elao normal ona, tanba F-FDTL labele hela metin halo seguransa iha neba, tanba iha aktividade seluk atu halo. Presiza konfiansa ba Polisia Nasional Timor Leste hodi halo Seguransa rai laran ninian.

Iha distritu Viqueque no Lautem sei retira bainhira situasaun iha neba lao diak ona.
Nia mos dehan, situasaun iha Dili laran kuaze fulan nene nia laran situasaun ladun diak, hodi nune’e prezensa F-FDTL aguenta tan hodi fo seguransa ba povu tomak.

Maibe dehan nia, ema hot-hotu tenki rekonhese katak iha mudansa bo’ot ba relasaun seguransa iha rai ne’e. Nia mos husu ba komunidade, autoridade hotu atu kopera malu ho Nasoens Unidas no Forsa Seguransa Internasional atu labele presiza tan F-FDTL iha fatin-fatin.

Relasiona ho numeru soldadu F-FDTL oras ne’e iha kuaze 700 resin, sira halo esforsu nafatin hodi okupa iha fatin nebe fo perigu seguransa ba povu.

Nune’e dehan nia, iha futuru tenki dezenvolve forsa no sei halo rekrutamentu iha tinan oin mai.
Prezensa F-FDTL iha distritu parte Leste, povu husu tan atu monta pos seguransa iha bairu-bairu atu sira bele hakmatek.

Husu kona ba prosesu dialogu ho petisionariu, dehan nia, ne’e responsabilidade estadu nian no F-FDTL pronto atu halo dialogu ho se deit. (Sar)