TP, Quinta-feira, Novembru 29, 2007

Dili - Tribunal Distrital Dili, Kinta (29/11) horseik, fo sai ona desizaun final hodi fo kastigu kumarka ba arguidu membrus F-FDTL nain hat (4) nebe involve iha kazu tiru mate no kanek membru Polisia Nasional Timor Leste (PNTL), 25 Maio 2006, iha edifisio Ministeriu Justisa nia oin, Kaikoli – Dili.

Arguidu membrus F-FDTL sira ne’e maka Raimundo Madeira ho kastigu kumarka tinan 12, Nelson da Silva ho kastigu kumarka tinan 11, Francisco Amaral ho kastigu kumarka tinan 10 no Armindo da Silva ho kastigu kumarka tinan 10.

Tribunal Dili fo desizaun ne’e ba arguidu nain 4 tanba hahalok nebe sira halo ne’e kontra ona Kodigu Prosesu Penal Indonesia (KUHP) artigu 338 katak involve oho no artigu 55 kona ba tentativas oho ema, hodi halakon membrus PNTL nain 8 inklui kanek nain 21.

“Pena prizaun nebe arguidus nain hat, Raimundo Madeira, nelson Da Silva, Francisco Amaral no Armindo Da Silva hetan ho kalkula ho tinan 43. Tanba kontra Kodigu Prosesu Penal Indonesia (KUHP). Artigu 338 katak involve oho no artigu 55 kona ba tentativs oho ema. Nune’e hodi hakanek no halakon mos membrus PNTL nia vida, “ informa juiz meza Ivo Rosa, Kinta (29/11) iha Tribunal Rekurso Kaikoli, Dili.

Iha julgamentu final ne’e tribunal Dili mos fo livre ba arguidu nain 8 seluk tanba durante julgamentu laiha provas katak sira involve halo krime.

“Maibe ba arguidus seluk lahetan sentese tanba durante julgamentu laiha provas katak sira involve halo krime,” juiz Ivo hateten.

Desizaun nebe fo sai husi Juiz meza Dr. Ivo Rosa, prokurador Bernardo Fernandes, advogadu Tomi Jerónimo, Arlindo Sanches no José Guteres, katak arguidus hirak ne’e hetan pena tanba sira nunka arepende hahalok hotu wainhira ato halo krime. Maibe durante julgamentu arguidus nain 4 ne’e hatudu lialos katak sira mak tiru hasoru formatura koluna PNTL nebe lidera husi Polisia ONU. Tan ne’e juiz konsidera katak arguidu Raimundo Madeira ho Nelson Da Silva iha nivel kultura a’as tanba sira deklara duni iha tribunal katak hasai uluk tiru hasoru koluna PNTL.

Além de ne’e, iha egisênsia prevensaun geral tribunal hare katak vida humana PNTL invioladu iha tempu neba.

“ Hatudu momos katak arguidus moris ho pratika krime nebe sere bebeik konflitu hodi halo vingansa ba problemas hotu. Tan ne’e hare ba gravedade nebe arguidus hadia fila fali. Atu nune’e bele iha prevensaun ba nivel nebe a’as. Tanba tuir lolos hanesan military tenki hatudu hahalok diak,” informa Ivo.

Bazeias ba faktus aprovadu, tribunal konsidera katak dados não patrimoniais (dana moral ba ba alezadu sira red) laiha dadus tanba despeza hamosu akontesimentu ne’e estadu mak selu. Nune’e iha KPP artigu 62 katak alezadu tenki hetan indimizasaun ba penas kadalas ba krime nebe sira hasoru. Ne’e duni tenki fo dados não patrimoniais PNTL nebe sai vitima ka aleza hia tinan kotuk.

Entertantu antes atu remata, juiz sei fo tempu ba advogadus durante loron sanulu resin lima (15) hodi hasae rekursu ba Tribunal Rekursu, hafoin arguidus sira foin bele kumpri lolos sira nia pena iha Komarka Becora.

Iha fatin hanesan, advogadu Arlindo Sanches ba jornalista katak sentese ba arguidus, nia sempre kumpri nafatin desizaun tribunal.

Maibe atu hatun tina sentese ba arguidus, depende ba rekursu nebe nia esforsu durante loron 15 nia laran.

Brigadeiru Taur: F-FDTL Sempre Simu Desizaun Tribunal.

Dili – Komandante F-FDTL Brigadeiru General Taur Matan Ruak hateten nia parte sempre simu kualker desizaun nebe maka Tribunal fo sai ba ninia element sira nebe maka hasoru prosesu julgamentu.

Taur hateten ida ne’e, Kinta (29/11), iha Dili, molok Tribunal foti desizaun ikus ba arguidu membru F-FDTL sanulu resin rua (12) nebe maka durante ne’e hasoru hela justisa, relasiona ho kazu tiru mate no kanek membrus PNTL, 25 Maio 2006, iha edifisiu Ministeriu Justisa nia oin.

Iha desizaun final tribunal Dili nian horseik ne’e, arguidu membrus F-FDTL nain 4 maka tenki tama kumarka hodi hetan kastigu no nain 8 seluk hetan livre.

Brigadeiru Taur dehan laiha tan dala seluk ne’e maka ninia parte sempre kolabora ho parte justisa.