TP, Quinta-feira, Dezembru 06, 2007

Dili - Hodi hametin liutan relasaun iha area forsas armadas nian, governu Portugal hakarak ona atu ninia military bele fo treinamentu ba F-FDTL.

Vontade diak Portugal nian ne’e ofisialmente sei hatudu liu husiakorsu ida maka sei asina husi Sekretariu Estadu Defeza, Júlio Tomas Pinto no Sekretariu Estadu Defeza Nasional no Assunto Maritima Portugal nian, João Mira Gomes, iha PalasioGovernu, Kinta (06/12) ohin.

Militar Portugal sei fo treinamentu ba F-FDTL iha area hat (4), ne’e mak; ajuda legal adviser ba Ministeriu defeza no mos ba F-FDTL, ajuda fo treinamentu ba military sira iha Metinaro no ajuda militar sira iha komponente naval iha Hera.

SED Gomes to’o iha Timor Kuarta (05/12) horseik.

Durante iha nia loron primeiru horseik, SED Gomes hasoru malun ona ho Prezidente Republika - Dr. Ramos Horta, Primeiru Ministru - Kay rala Xanana Gusmão, SED - Júlio Tomas Pinto, Komandante F-FDTL – Brigen Taur Matan Ruak, no representante especial Sekretariu Geral Nasoens Unidas iha Timor-Leste, Atul Khare.

Sekretariu Estadu Defeza Portugal ne’e dehan katak primeira vizita nebe nia hala’o mai Timor-Leste ne’e nia sente kontente tebes tanba militar Portugal iha komitmentu bo’ot atu fo nafatin sira nia ajudu hodi treina F-FDTL.

“Primeira vizita ne’e hau sente kontenti tebes atu mai Timor-Leste, hodi hare fatin treinamentu nebe forsa Portugal atu fo treina ba militar Timor-Leste,” dehan Gomes, hafoin hasoru malun ho PM. Xanana Gusmão.

Entretantu bainhira hasoru malun ho Brigadeiru Taur, SED Gomes sira koalia kona ba kooperasaun militar nebe Portugal atu halo dadaun ne’e.

“Ohin (Kuarta 05/12) hau mos ba hasoru malun ho Brigadeiru Taur Matan Ruak, ami koalia kona ba oinsa prosesu dezenvolvimentu F-FDTL ba future, liu-liu kona ba area formasaun kapasidade, rekrutamentu ba forsa hodi hodi hare futuru Timor-Leste. Tanba Portugal hanesan parseiru estratejiku inportante ba Portugal, no Timr Leste mos hanesan parseiru estratejiku ba Portugal,” nia solidenta.

Bainhira hare situasaun atual Timor-Leste, SED afirma katak, tuir nia hare situasaun seguransa iha Timor Leste seidauk estavel lolos, tanba ne’e nia husu Governu Timor-Leste presiza resolve didiak problema nebe mosu iha rai-laran, atu povu moris ho diak.

“Situasaun Timor-Leste seidauk estavel lolos, tanba ne’e ami hakarak kondisaun no situasaun hotu-hotu bele implementa programa ba tinan 10 mai, kuandu situasan estavel, nasaun sai hanesan forsa ida iha Estadu Demokratiku. Tanba ne’e ami hakarak hala’o nafatin kooperasaun ho forsa Timor-Leste, atu hadia forsa Timor Leste diak ba future,” nia hateten. (ego).