TP, Tersa-feira, Dezembru
11, 2007
Dili – Nudar obrigasaun
no dever estadu no povu Timor-Leste tomak atu valorize
no rekoñese ema sira nebe mak durante tempu
rezistensia fo ninia vida tomak atu hetan ideal
bo’ot ukun rasik a’an. Kondekorasaun
ne’e hanesan prosesu ida nebe halo iha tinan
ida liu ba atu fo valorizasaun ba ita nia antigu
kombatentes da libertasaun nasional.
Brigadeiru Jeneral Taur Matan Ruak
haktuir lia hiark ne’e ba jurnalista sira,
depois de serimonia intrega medalha ba veteranus
nain 76 foin lalais ne’e iha museum Rezistensia
Dili.
Seremonia fahe kondekorasaun ne’e
hala’o husi Prezidente da Republika, Dr. José
Ramos Horta, PM Kay Rala Xanana Gusmão, Prezidente
Tribunal Rekursu, Claúdio Ximenes, Brigadeiru
Jeneral Taur Matan Ruak, membrus PN no korpu diplomata
sira (Embaixador-red) iha Timor.
Taur deklara katak kontente ho
valorizasaun no rekoñesimentu nebe mak estadu
no povu Timor-Leste fob a veteranus sira. Tan ne’e
sai mos hanesan dever no obrigasaun estadu no povu
Timor-Leste atu valoriza no rekoñese sira
nebe mak servisu ba rai ida ne’e hodi haluha
sira nia-an rasik. “Naturalmente sei iha servisu
barak nebe ita sei halo par abele kompleta, maibe
ne’e hanesan pasu pozitivu ida atu to’o
iha prosesu ida neba,” katak Taur.
Iha fatin hanesan, veteranus ida
nebe simu kondekorasaun Francisco Perreira alias
Ipisina husi Distritu Lautem, senti kontente ho
valorizasaun nebe mak estadu fo ba sira no nia espera
katak ba oin estadu pelu menus sei hare netik mos
sira nia vida moris hanesan buat nebe mak vigora
ona iha lei veteranus sira nian.
“Hau la husu atu estadu tenki
fo rekoñesimentu ka valoriza servisu nebe
ami halo ba nasaun ne’e, tanba uluk ami servisu
laos ho hanoin atu loron ikus hetan hanesan ne’e,
maibe tanba estadu hakarak ona atu fo buat ruma
mai ami, ami simu ho kontenti,” tenik Ipisina.
Iha fatin ketak Prezidenti Komisaun
Homenazen, Virgilho Smith hateten katak, prosesu
fahe kondekorasaun ne’e sei lao nafatin tanba
iha veteranus barak mak seidauk simu. Hau haluha
tiha ona numeru hira mak seidauk simu, maibe tuir
hau nia hatene katak numeru sira nebe mak seidauk
simu bo’ot liu numeru sira nebe mak simu tiha
ona,” nia afirma. (TP).
