DILI- Komandante Jeral Falintil-FDTL, Brigadeiru Jeneral Taur Matan Ruak apela ba grupu Major Alfredo Reinado Alves ho Petisionariu atu kumpri lei wainhira iha samada atensaun husi tribunal.

Brigadeiru Taur hatoo lia hirak nee ba jornalista sira hafoin halao inkontru semanal ho Prezidenti Jose Ramos Horta iha Palacio da Cinzas, Kaikoli, Dili, Kuarta (5/12).

Nia mos husu ba Major Alfredo ho Petisionariu atu la bele hamosu fali argumentu katak tenki hein prosesu tribunal militar nian, tanba iha realidade lei militar ho tribunal militar nian seidauk iha.

“Elementu F-FDTL mos submete ona ba prosesu lei iha tribunal sivil nian, nebee realidade hatudu ba ita katak balu hetan duni ona detensaun. Tanba nee, hau husu atu Alfredo ho Petisionario la lika gasta tempu atu koalia, tanba sei hela ho koalia deit basa ita agora lao tuir situasaun ho kondisaun nebee ita nia nasaun iha,” Taur hateten.

Hatan kona ba preprasaun F-FDTL nian ba prosesu dialogu Major Alfredo no Petisionariu, Brgadeiru Taur hateten, parte F-FDTL prontu no sempre hein iha kualker oras atu halo dialogu.

Major Alfredo Reinado Alves iha nia deklarasaun foin lalais nee hateten, nia pronto atu hatan iha tribunal wainhira governu resolve ona kazu Petisuionariu nian.

Alfredo hateten, kazu Fatu-Ahi iha 2006 nebee nia komete, nia pronto ba hatan iha tribunal militar. Laos ba hatan iha tribunal sivil, tanba tuir Alfredo kazu Fatu-Ahi nee nudar kazu militar laos sivil.
2008, F- FDTL Rekruta Ema 300.

Iha oportunidade nee, Taur mos informa katak Falintil-FDTL iha ona politika atu rekruta tan ema hamutuk nain 300, inklui mos ema nebee hasai kursu formadu estrata I (S-1) atu koloka iha pozisaun ofisial nian iha Juni ou Julhu 2008.

Tuir Taur, prosesu ba rekrutamentu ema S-1 nee hanesan asuntus rekomendasaun husi Primeru Ministru (PM) Kay Rala Xanana Gusmao, wainhira sei kaer pozisaun hanesan Presidenti Republika, ho razaun katak ofisial sira ba leten mais ou menus ema nebee mak hasai kursu S-1.