TP, Sesta-feira, Des 14, 2007

Dili – Governu sei aumenta salaries ba membru F-FDTL sira iha tinan 2008 oin mai. F-FDTL mos sei hetan subsidiu ba viajen privadu.

Programa diak ba F-FDTL nian ne’e bazeia ba proposta orsamentu Sekretariu Estadu Defeza nian nebe hamutuk milaun $14 ba tinan fiscal 2008.

Tuir planu, salario membru F-FDTL nian sei aumenta to’o $127.00 husi $85.00.
Kestaun hirak ne’e hato’o husi Sekretariu Estadu Defeza, Júlio Tomas Pinto ba jurnalista sira hafoin remata diskusaun proposta orsamentu geral estadu nian ba tinan 2008 ho komisaun B assuntu seguransa e defeza, Kinta horseik iha parlamentu.

“Salariu ba F-FDTL nian, klaru ida ne’e sai prioridade bo’ot husi programa annual Sekretariu Estadu Defeza nian, tanba hare katak kestaun ne’e sai hanesan preukupasaun bo’ot ba representate povu, li-liu ba povu Timor Lorosa’e hotu, inklui mos sai razaun husi krize tinan kotuk liu ba. Tanba ne’e ba futuru ami hadia ona sira nia salariu nebe mak inklui ona iha proposta orsamentu ne’e,” informa Júlio.

Júlio realsa katak, salario ne’e, se parlamentu aprova, konserteza kada membrus F-FDTL sei simu vensimentu $127.00.

“Purtantu maske ki’ik, maibe tanba ita tenki la’o neneik. Se kompara ho tinan kotuk, kada forsa so simu deit $85.00,” dehan nia.

Alem de salariu, Júlio hatutan, iha subsidiu mos ba kada forsa, wainhira halao viajen passa ferias. Purtantu wainhira sira ba vizita familia, iha mos subsidiu ba transporte no seluk tan.

Liu tan Júlio esplika, iha mos prioridade atu hasa’e rekursu humanus ba mebrus F-FDTL sira. Tanba oras ne’e forsa F-FDTL ladun iha rekursu humanus nebe ke sufsiente, li-liu ba nivel strata no mestradu sira.

“Tanba ne’e, iha montante ne’e mos inklui ho programa atu haruka sira ba eskola, nebe mak bele iha UNTL ka ba liur (estranjeiru), liliu mos programa haruka ba sai membru kolejiu iha Australia, Indonesia ka iha fatin seluk,” hatutan Júlio. Além de ne’e, iha mos planu halo rekrutamentu sarjana enjenharia sira, atu bele tama ba iha kompañia nebe mak komando prepara hela.

Parte seluk, Júlio hateten atu hasa’e kapasidade F-FDTL, husi sekretariadu ba parte asistensia teknika nian, tuir planu mos sei halo rekrutamentu ba timor-oan balun iha Portugal, ke oras ne’e reforma tiha ona husi military.

“Timor-oan sira ne’e mesak iha kapasidade militar no sira prontu atu mai fo treinamentu ba F-FDTL. Purtantu, ita iha tiha ona akordu ho Portugal kona kooperasaun tekniku militar no sei realiza iha tinan oin, se kuandu ita nia orsamentu ne’e passa. Além de iha mos orsamentu uitoan ba adviser nasional timor-ona neb ke iha kapasaidade atu sira bele sai analisis ba Sekretariadu Defeza,” nia hateten.

Júlio hatutan tan katak ,husi orsamentu nebe mak iha, sufsinte duni atu aloka hotu sira nia programa durante tinan ida. Tanba tuir duni programa neb ke preparadu tiha ona.

“ Por exemplu, planu atu oinsa bele kria lei, tanba ba tinan oin ami iha planu tolu mak atu hala’o. Ida mak legal reform, ifrakstrutura no seluk mak kona ba konsolidasaun sivil militar, nebe mak iha konsolidasaun ne’e sei hala’o husi F-FDTL no militar sira no entre PNTL no F-FDTL sira. Maibe kona ba legal-reform, tanba ita sei presiza lei iha reforma militar, liliu ba polisia militar (PM) no mos lei ba prokurament militar nian. Tanba militar nia prokurament la’os parte ida husi sivil nian, nebe mak susar atu ita kontrola sasan neb eke tama mai, liliu kona ba sasan militar nian,” nia akresenta.

Parte seluk,hatan kona ba ezekusaun orsamentu tranzisaun nian, Júlio hateten ba Sekretariadu Defeza oras dadaun konsege exekuta ona orsamentu kuaze 92% husi total nebe ke iha.

“Signifika orsamentu ne’e bele hotu iha fim-de-Dezembru, maske iha ida ka rua mak sei tama iha Cary Overs, maibe ami fiar katak sei exekuta hotu,” nia afirma.