TP, Sesta-feira, Des 14, 2007

Dili – Forsas Armadas F-FDTL prontu fo seguransa ba iha selebrasaun loron Natal no Tinan Foun oin mai bainhira presiza.

Komandante F-FDTL, Brigadeiru Jeneral Taur Matan Ruak hateten ida ne’e ba jurnalista, Kuarta (12/12), hafoin halo enkontru semanal ho Prezidente Repubika, José Ramos Horta, iha Palacio das Cinzas, Kaikoli, Dili.

F-FDTL mos hein katak, iha selebrasaun loron bo’ot Natal no Tinan Foun oin mai ne’e povu Timor-Leste bele hetan dame no Paz, atu nune’e buat hotu bele lao diak.

Tanba povu Timor-Leste hakarak moris hakmatek iha ambiente ida dame no nakonu ho sentiment simu malun no hakoak malun.

Nia dehan iha loron bo’ot nebe mai dadaun, povu iha Timor-Leste bele halo reflesaun ba vida moris nian.

Relasiona ho planu instuituisaun F-FDTL atu monta postu iha fronteira, eis komandante Falintil ne’e hateten, sira hanoin ona planu ida ne’e, maibe seidauk iha planu konkretu.

Iha parte seluk, Taur mos salenta katak, F-FDTL pronto atu fo ajuda ba Ministeriu Solidariedade atu tula sasan deslokadu sira ba baze, maibe ne’e mos depende ba Ministeriu Solidariedade husu.

F-FDTL mos ajuda tiha ona Ministeriu Solidaridade hodi aloka ekipamentu deslokadu ba baze iha fulan hirak liu ba. Nune’e agora atu ajuda tan depende ba pedidu husi sira.