Dili, Prezidente Parlamentu Nasional
Fernando Lasama de Araujo husu ba instituisaun
F-FDTL no PNTL tenki fo liman ba malun no
servisu hamutuk para lori nasaun ne’e
ba oin.
“Tanba imi mak defeza no seguransa
nasaun ida ne’e nian. Atu hatudu imi
nia domin ba nasaun ida ne’e liu husi
neutralidade, liu husi imi nia profesionalismu.
Primeiru liu husi ita nia atitude nebe diak
ba nasaun ida ne’e no husi ita nia preukupasaun,
ita nia hakarak bo’ot atu servisu lori
nasaun ida ne’e ba oin,” katak
Lasama iha seremonia Natal hamutuk F-FDTL
no PNTL iha genasio Dili, Sesta dia 04 de
Janeiru 2008.
Prezidente PN husu ba instituisaun rua ne’e,
tenki haburas, habo’ot domin iha ida-idak
nia laran atu nune’e bele servi nasaun
no povu ho domin tomak.
“Purtantu ida ne’e mak hau husu
ba seguransa sira tenki fo liman ba malu fo
domin ba malu, atu nune’e ita nia seguransa
ne’ bele lao ba oin ho susesu,”
nia hateten iha nia deskursu.
Natal hamutuk nebe prezensa mos Primeiru
Ministru Xanana Gusmão no reprezenta
ONU iha Timor Leste, Atul Khare ne’e,
Lasama hateten parlamentu sei haka’as
an iha tinan 2008 atu bele hare lei nebe instituisaun
rua ne’e presiza. PN sei hein husi governu
atu hato’o ba PN kona ba lei sira nebe
mak instituisaun rua ne’e presiza iha
2008.
Ba PNTL, nia husu tenki hado’ok an
husi familia atu nune’e bele konstrui
ita nia nasaun. Tanba ita nudar seguransa
no defeza ita tenki halo tuir lei nebe mak
iha, atu nune’e povu bele fo konfiansa.
“Tanba ne’e hau husu ba instituisaun
rua ne’e tenki tane ba leten, atu nune’e
komunidade sira bele fiar nafatin tanba husi
fiar mak bele iha autoridade legal,”
katak Lasama.
Tuir nia katak iha loron komemora festa Natal
no Tinan Foun hanesan tempu ida nebe ema halo
refleksaun. Tanba programa governu iha ona
ba area defeza no seguransa no hamutuk ho
Sekretariu Estadu nain rua trasa ona programa
ba 2008 oinsa mak atu habelar liu tan no haforsa
liu tan servisu husi F-DTL no PNTL.
Nia kestiona tan katak, buat nebe akontese
iha tinan 2007 husik ona ba, lori tiha ona
ita nia ida-idak nia frakeza, hahalok nebe
ladu’un diak ba ita nia kolega ba ita
nia intitutuisaun atu nune’e iha 2008
ne’e lori fali domin nebe mak iha ita
ida-idak nia fuan atu lori servi ita nia nasaun,
ita nia rai, tuir knar ida-idak nian.
“Nasaun ida ne’e seguransa no
estabilidade iha forsa F-FDTL no PNTL nia
liman. Tanba ne’e PNTL sei haka’as
an atu tau matan ba governu nia servisu no
sekretariu estadu rua ne’e labele hamosu
fila fali buat diskriminasaun uitoan-uitoan
nebe mak ita imi hasoru iha tinan kotuk ba”,
tenik Lasama.
Purtantu Primeiru Ministru no Ministru Defesa
sei taumatan ba ida ne’e maka’as
tuir komitmentu Parlamentu Nasional no Kuatru
Governu Konstitusional maske ema barak dehan
inkonstitusional, laiha buat ida, maibe interese
liu mak komitmentu iha instituisaun orgaun
soberania rua ne’e atu lori servi nasaun
ida ne’e no servi povu ida ne’e.
Photogrpher: Paulino
I. V. Sousa
