Media Defeza, Sesta-feira 01 Fev 2008

Dili – Falintil-FDTL iha tinan 2008 sei rekruta tan ema nain 300. Orsamentu ba ba forsa 300 hetan ona aprovasaun husi Parlamentu Nasional iha Dezembru liu ba.

“Planu Governu nian, sei rekruta tan ema 300 ba F-FDTL,” dehan SED, Júlio Tomas Pinto hafoin partisipa seminar prosesu orsamentu annual F-FDTL iha Ministeriu Finansas, Sesta (01/02).

Prosesu rekrutamentu ne’e Júlio Tomas dehan, ne’e kompetente Komando Falintil-FDTL hodi kordena mos ho Ministeriu relevante para ajuda prosesu ne’e ba oin.

Ba tinan ne’e nian, governu hatama ona orsamentu, liu-liu kodisaun rekrutamentu nian. Salariu ba ema na’in 300 ne’e prepara tiha ona, inklui mos kondisaun servisu ba sira. Preparasaun ba rekrutamentu ne’e sei presiza hadi’a tan Sentru Treinamentu Metinaro, hanesan fatin parade, no mos fatin tes psikologia ni’an.

Ministeriu Defeza bele halo hotu iha tinan ida ne’e nia laran, maibe nia impaktu mak orsamentu ba ministeriu seluk bele la to’o. Tanba ne’e sei hala’o deit tuir planu orsamentu ne’ebe iha. Tinan oin mak hare’e planu diak, liu-liu espesial ba planu 2020.

Tuir mai, SED, Júlio Tomas hatutan tan katak, tuir informasaun ne’ebe Ministeriu Defeza hetan, uluk Sentru Treinamentu Metinaro nian husi governu Australia nian mak halo. Governu TL seidauk iha investe maka’as hodi hadi’a buat sira ne’e. Maibe tuir nia hanoin, Sentru Treinamentu ne’e importante tebes, atu nune’e ba oin bele iha posibilidade kria akademi militar ou la’e. Agora presiza hadi’a uluk mak fatin preparasaun bai-bain, hanesan kursu ne’ebe halo iha neba.