Media Defeza, Tersa 26 Fev 2008

Dili – Xefe Estadu Maior ba Komando Operasaun Konjunta F-FDTL – PNTL, Tenente Koronel Filomeno Paixão informa katak operasaun komando konjunta ne’ebe hala’o opersaun desde Sesta semana kotuk, seidauk bele detekta fatin grupo rebeldes ne’ebe lidera husi Eis Tenente Gastão Salsinha ho Eis Ajenti Polisia Susar.

Tuir TenKor. Meno katak, maske operasaun seidauk hetan Salsinha ho Susar nia fatin, maibe sira observa nafatin movimentu ne’ebe hala’o husi ema nain rua ne’e to’o teritoriu Timor Leste tomak.

“Komando operasaun konjunta ne’ebe ami hala’o ona, ami hakarak informa katak Salsinha ho Susar sira nia movimentu ami akompanha nafatin, e ami hatene diresaun ne’ebe Susar hola, ami hatene hotu sira nia fatin. Maibe ami la ba duni sira atu oho no kaer sira, maybe ami husu sira intrega-an, atu koopera ba justisa,” informa TenKor. Filomeno Paixão iha konferensia da imprensa iha salaun Memorial Hall. Konferensia ne’e mos akompanha husi Adjuntu Komandante Operasaun PNTL, Mateus Fernandes.

Filomeno Paixão apela ba Eis Tenente Gastão Salsinha ho Susar atu intrega-an didiak ba komando konjunta hodi bele hasoru justisa. Tanba tuir dalan intrega-an maka diak liu atu resolve problema rai laran.

“Hau apela ba Salsinha no Susar atu labele tauk tanba atentadu 11 Fevereiru liu ona. Agora ami husu atu sira bele kontaktu ami hodi intrega-an, se tauk bele kontaktu ho Nai-ulun sira tanba problema dia 11 Fevereiru ne’e ema seluk maka halo, hodi Salsinha mak hodi todan. Tanba ne’e mak ami husu nia atu intrega-an ho didiak tanba ami fiar katak operasaun ne’e sei la’o diak bainhira sira hakarak intrega-an ho diak,” TenKor. Meno husu.

Tuir TenKor. Filomeno Paixão katak, operasaun ne’ebe komando konjunta hala’o la’os atu ba tiru malu ho grupu Salsinha ho Susar nian, maybe husu grupu armadu hotu atu intrega-an ba estadu.

“Ami hakarak klarifika ba povu tomak katak, operasaun ne’ebe soldadu sira hala’o la’os atu ba buka Salsinha, Susar ho ninia grupu seluk-seluk ne’ebe naran iha lista Prokurador Geral Repúblika, tanba ami la ba halo funu para oho sira. Ami ba para konferse sira hodi intrega-an hodi kolabora ho justisa,” nia informa.

“Ami dehan ida ne’e atu husu ba povu sira atu kompriende didiak ho ami nia sistema operasaun ne’e, la’os atu hala’o funu sira. Tanba ne’e mak mai husu ba povu atu koopera ho ami hodi resolve ita nia problema ne’e,” tenik nia.

Nia esplika katak, operasaun konjuntu hala’o hahu husi loron Sesta to’o agora seidauk hetan problema ruma iha durante operasaun.

“Ami mos lancha nafatin panfleitu ba grupu sira ne’ebe prokurador fo mandatu kapturasaun, atu sira bele intrega-an ba komando konjunta,” nia esplika.

Nia dehan, operasaun konjunta ne’e sei hala’o husi parte leste Fatu-Ahi ba to’o Rai-Kotu, Tibar, Liquiça, Maubara no oras ne’e dadaun forsa sira desloka la’o to’o ona Sub-Distritu Atabae, maibe seidauk hetan insidenti ruma.

Petisionario Nain Lima Intrega-An

Entertantu, Tenente Koronel Filomeno paixão mos informa mos katak, iha primeira operasaun, membrus petisionariu nian nain lima husi parte Nahaek-Dare konsege intrega-an ba F-FDTL no PNTL hodi tula sira nain lima ba hamutuk ona ho sira nia kolega iha akontanamentu, Aitarak laran, Dili.

“Durante operasaun hahu, so uniku iha parte Nahaek, Dare ami konsege hetan ita nia alin petisionariu nain lima mak intrega-an ona ba komando konjunta hodi haruka sira nain 5 ba fatin akontanamentu Aitarak Laran, Dili,” nia dehan.

Tuir nia, oras ne’e dadaun sira hala’o ona kontaktu ho Administrador Distritu sira hotu ho koopera ho Xefe Aldeia sira no Xefe Suku sira iha Distritu hotu-hotu atu informa ba povu bele koopera ho komando konjunta atu bukan solusaun diak rezolve situasaun rai laran sai hakmatek.

Tuir TenKor. Filomeno, sira sei hala’o nafatin operasaun ne’e to’o hetan grupu Salsinha ho susar atu intrega-an ho diak.

“Operasaun ida ne’e ami sei hala’o nafatin to’o ami hetan kontaktu ho grupu Salsinha ho Susar atu intrega-an para koopera ho justisa,” nia dehan.

“Hau hakarak dehan, operasaun ne’e ami sei lakohi atu uza forsa, no segundu operasaun ne’e ami hala’o karik karik lahetan solusaun, maka ami foin bele uza forsa bainhira Salsinha ho Susar ninia grupu tiru hasoru ami, tenik nia.