Media Defeza, Kinta-feira
27 Fevereiru 08
Dili - Primeiru Ministru Kay
Rala Xanana Gusmão no Brigadeiru General
Taur Matan Ruak hala’o enkontru ho Bispo Diocese
Dili, Don Alberto Ricardo da Silva, hodi koalia
kona ba kazu grupu Gastão Salsinha nian.
Enkontru ne’e hala’o kuaze oras rua
nia laran, iha Kuarta-feira (27 Fevereiru) lo’raik,
iha rezidensia Bispo Diocese Dili, Lecidere - Dili.
“Laiha deklarasaun formal ruma husi enkontru
entre lider nain tolu ne’e.” Rezultadu
ne’e hetan bainhira jurnalista sira husu ba
Vigariu Geral Diocese Dili nian, Amo Apolinario
Guterres kona ba enkontru ne’e.
Fontes ida husi autoridade governu katak, ekontru
entre lider sira ne’e, hodi koalia kona ba
kazu grupu Gastão Salsinha nian ne’ebe
mak hakarak intrega an liu husi Igreja Katolika.
Maibe ne’e sei iha prosesu laran hela, seidauk
iha desizaun ne’ebe konkretu.
Asuntu kona ba intrega an husi grupu Gastão
Salsinha nian liu husi igreja ne’e sei hare
liu husi Ministeriu Defeza no Seguransa nian. Hato’o
husi Sekretariu Estadu Konselhu Ministru, Hermenegildo
(Agio).
Wainhira husu komentariu ba Sekretariu Estadu Defeza,
Júlio Tomas Pinto Kona ba asuntu ida ne’e,
nia hateten katak asuntu laiha komentariu.
Entertantu, Xefe Estadu Maior ba Komando Operasaun
KonjuntaF-FDTL – PNTL, Tenente Koronel Filomeno
Paixão de Jesus dehan katak informalmente
parte Forsa Defeza no Seguransa rona ona informasaun
ida ne’e.
“Se Salsinha hanoin hanesan ne’e diak
liu tan (intrega an liu husi Igreja Katolika ne’ebe
informalmente ami rona), atu ita resolve problema
ne’e ho diak.” Dehan TenKor. Meno Paixão.
Nia hatutan tan katak, iha tempu badak nia laran,
Eis Tenenti Gastão Salsinha no Eis Adjenti
Polisia “Susar” se intrega an.
“Hau fiar katak, Salsinha ho Susar sei mai
hamutuk ho sira nia grupu hodi intrega an, atu ita
hotu bele resolve problema ne’e tuir dalan
hodi buka solusaun pasifiku,” Hato’o
husi TenKor. Meno Paixão iha Salão
Memorial Hall, Farol – Dili.
Nia hateten, oras ne’e operasaun konjunta
hatene ona lolos Salsinha ho Susar nia fatin. Maibe
nia lakohi informa konaba fatin ne’e, tanba
tuir informasaun katak Salsinha hakarak intrega
an tuir Igreja.
Iha fatin hanesan, TenKor. Filomeno Paixão
mos informa katak, to’o horseik Petisinario
hamutuk 480 mak aprezenta an ona iha Aitarak-Laran,
Dili.
Aproveita ho tempo no fatin ne’ebe hanesan,
nia mos agradese ba Forsa Internasional no autoridade
sivil sira hotu ne’ebe kontribui fo suporta
mai nia operasaun durante loron hira nia laran,
e fo suporta mos ba oinsa atu tia hetan solusaun
ba kazu petisionario nian.
