Media Defeza, Kinta-feira 27 Fevereiru 08

Dili – Komando Operasaun Konjunta F-FDTL – PNTL hala’o operasaun Tersa(26/02) liu ba ne’e konsege prende ona farda loreng military nian hamutuk 500.

Xefe Estadu maior ba Operasaun Konjunta F-FDTL - PNTL, Tenenti Koronel Filomeno Paixão dehan, farda militar 500 sira ne’e, hetan iha Kompanhia Internasional ida iha Dili laran.

Parte seguransa lakohi identifika kompanhia no ema ne’ebe fo suporta farda militar ba matebi’an Alfredo Reinado. Investigasaun ba kazu ne’e sei la’o hela, dehan Komandante Meno Paixão.

Alende ida ne’e, iha fatin seluk iha kapital Dili, komando operasaun konjunta mos konsege prende ekipamentus hanesan radiu Motorola rua, samurai lima, double stick rua, rama ambon ho fiska ha’at, kappa udan ida, inklui Granada ne’ebe forsa sira prende iha area Taibessi iha Domingo.

Komandante Paixão dehan, fiska ne’ebe refere ne’e fabrika husi rai liur, no se kuandu tiru ema ruma sei halakon ema nia vida.

“Fiska ne’e tuir ami hare’e nia forsa tiru, kuandu ema uza fiska ne’e ho rama ambon bele oho kualker ema, halakon ema ida nia vida,” dehan nia iha Memorial Hall Farol, Dili. Nia dehan oras ne’e dadaun, sira hala’o ona investigasaun kle’an ba kompanhia ne’ebe sira prende farda no mos ba ema sira ne’ebe mak hodi rama ambon no radiu Motorola.

“Kona ba kompanhia nia na’in ami prende ona sira e agora investigasaun ba ema ne’e ami sei hala’o hela, no ami seidauk bele fo konkluzaun ba media kona ba rezultadu ne’e, maibe hau esperansa katak, buat ne’e sei mai hotu bainhira investigasaun remata,” nia informa.

Nia dehan Komando Operasaun Konjutna senti kontente tebes ho operasaun ne’ebe la’o diak, tanba hetan reasaun daik husi populasaun sira.

Nia mos informa tan katak, Adjenti Polisia UIR, Dario Lion ne’ebe uluk hala’i hamutuk ho Alfredo Reinado mos agora intrega an ona iha loron Tersa (25/02). E agora iha autoridade lei nia liman.