DILI, TP.
Sesta, 31 Agusto 2007
HERA-Militante Fretilin husi kampu deslokadu
Hera halo manifestasaun hasoru visita kortezia Sekretariu
Estadu Defeza, Julio Tomas Pinto, Kuarta (29/8)
iha Kuartel Unidade Maritima F-FDTL Hera.
Asaun militante Fretilin nebe maioria labari ki’ik
sira, juventude, katuas no ferik balun ne’e
trata liu SED, Julio Tomas Pinto ne’e Otonomista,
no nega tiha ukun-an, no agora hadau fali kadeira.
Sira nia asaun ne’e mos hakilar hasoru SED
katak nia mak uluk hamutuk ho Octavio, lori manu-tolun
tuda hasoru Bispo Dom Carlos bainhira simu Nobel
da Paz to’o iha Jakarta.
Militante fretilin sira hateten, Julio Tomas Pinto
la merese sai Sekretariu Estadu Defeza, tanba uluk
dehan Fretilin iha ai-laran bele luta oinsa mos
Timor sei la ukun-an. Tanba ne’e sira lakohi
Julio Tomas Pinto agora mai fali ukun F-FDTL.
Alem de halo manifestasaun hasoru SED Julio Tomas
Pinto, militante Fretilin hirak ne’e mos trata
no tolok hasoru jornalista sira nebe hakbesik an
hodi halo kobertura. Sira kondena makas jornalista
sira katak, sira nia lider Fretilin koalia ida,
jornalista inventa tan hodi hakerek oin seluk.
Entertanu asaun ne’e konsege atua F-FDTL
parte unidade marítima nian nebe koloka iha
portu Hera.
Manifestasaun sira hamrik deit iha redi liur mak
hakilar tama ba Kuartek unidade maritima nian, bainhira
delegasaun SED Julio Tomas Pinto nebe akompanha
direitamente husi komandante geral Taur Matan Ruak
to’o iha fatin.
Iha asaun militante Fretilin nian ne’e la
lori spanduk maibe sira uza deit bandeira Fretilin
ida tau iha ai, no liki ba mai deit hodi hakilar
VIVA FRETILIN.
Bainhira sira hakilar no liki bandeira Fretilin,
soldadu F-FDTL unidade maritima sira mos hakbesik
mos ba sira hodi hirus no ameasa sira atu taka tiha
be no ahi electrisidade ba sira. Soldadu unidade
maritima sira mos hakilar militante fretilin sira
atu rai tiha bandeira Fretilin.
Maske asaun ne’e halao durante vizita SED
Julio Tomas Pinto maibe laiha violensia fizika ruma
mak mosu.
POLITIKA DEFESA NIAN.
Nune’e mos bainhira halo visita ba Quartel
Geral F-FDTL Taci-Tolu, Kuarta (29/08), Julio Tomas
Pinto hateten katak atu determina mudansa ba F-FDTL,
governu sei defini uluk politika Defeza nian. Maibe
atu dezenvolve F-FDTL iha iha tempu badak ne’e,
importante mak tenki kria uluk kondisaun ho fasilidade
nebe maximu ba F-FDTL.
“Atu halo mudansa ba F-FDTL, tenki uluk defini
politika kona ba defeza nian, ida ne’e mak
bele determina tun mai. Mas buat ida nebe importante
iha tempu badak, ita tenki kria ne’e mak oinsa
ita hare fasilidade ba forsa,”katak Julio.
Nia rekoñese mos katak uluk nia sei iha
liur hakilar bebeik forsa tenki profesional, maibe
realidade iha vizita kortezia ne’e hare duni
ho matan F-FDTL sei labele sai forsa nebe profesional
enkuanto laiha fasilidade nebe maxima.
“Durante ne’e ita iha liur ita hakilar
militar tenki profesional, mas mai hare tiha situasaun
ida ne’e hau hanoin katak situasaun la permiti
atu dezenvolve militar ne’e diak liu ba oin
atu sai militar profesional,” Julio hateten.
Tanba ne’e tina fiskal oin mai ne’e,
katak Julio, governu sei dezenvolve quartel ida
ba F-FDTL no mos ministeriu Defeza. Alem de ne’e,
tuir nia katak planu nebe governu foun ne’e
mos sei halo revizaun ba salariu F-FDTL, no sei
servisu hamutuk ho governu china para hadia lalais
uma 100 ba F-FDTL iha Metinaro.
Husu kona ba objektivu vizita ne’e, nia hatan
katak, F-FDTL nudar instituisaun nebe mak servisu
hamutuk ho ministeriu defeza, entaun nia prezensa
ne’e para buka hatene saida mak sai preukupasaun
ba F-FDTL, karik falta de fasilidade ruma mak ladun
sufsiente.
Vizita ne’e mos atu koñese diak liutan
komandante sira iha F-FDTL nia laran, no mos aban
bainrua bele kordena servisu nebe diak liu tan.
Tanba tuir Julio Tomas Pinto katak, knar nebe simu
ne’e nudar kargu foun ida ba nia, entaun atu
servisu iha grupo no ema balun, mas la koñese
ema ida, ne’e hanoin nebe objetivu atu dezenvolve
buat sira nebe hakarak durante ne’e sei la
to’o.
Ho vizita ne’e para hatene diak liu tan no
hetan esplikasaun diak liu tan husi komandante sira,
para nia rasik bele iha koñesimentu kona
ba saida mak sai prioridade atu governu tenki hadia
uluk.Durante vizita kortezia ne’e, tuir observasaun
Timor Post hare katak, hetan atensaun maka’as
husi soldadu to’o ofisial sira hotu. Maske
nune’e to’o Unidade Maritima Hera, hasoru
ho manifestasaun husi militante Fretilin.
Vizita Pinto nian iha Quartel Geral F-FDTL Taci-Tolu
ne’e simu ho guarda de honra nebe akompaña
direitamente husi Major Coliati.
Hafoin simu tiha, Major Coliati lori Pinto aprezenta
ba ofisiais sira, depois halo enkontru kedas ho
Chefe Estadu Maior F-FDTl, Coronel Lere Anan Timor,
e remata halo mos enkontru ho ofisiais hotu no mos
ho Brigadeiro Taur Matan Ruak.
Remata husi enkotru ne’e, Brigadeiru Taur
ho Coronel Lere Anan Timor inkui ofisiais hotu,
akompaña Pinto ba hare direitamente kondisaun
iha Quartel laran ate to’o dapur.
Hafoin vizita iha Taci-Tolu, Pinto mos hetan akompaña
husi Brigadeiro Taur Matan Ruak halo vizita mos
ba Unidade Maritima Hera, hodi halo enkontru mos
ho ofisiais sira.
