DILI, TP.

Sesta, 31 Agusto 2007

DILI, Ofisias hotu iha Quartel Geral F-FDTL hato’o preukupasaun kona ba problema infrastrutura no laiha kondisaun nebe diak atu halao servisu ba Secretariu Estadu Defeza nian, Julio Tomas Pinto nebe halao vizita kortezia, Kuarta(29/08).

Chefe Estado Maior F-FDTL, Coronel Lere Anan Timur hafoin enkontru ho SED(Sekretariu Estadu Defeza) fo hatetene katak, iha enkontru ne’e sira mos aprezenta ona kona ba problema infrastrutura nian nebe mak difikulta sira durante ne’e laiha kondisaun ida diak.

“Ohin Sekretariu Estadu Defeza, Julio Tomas Pinto mai, primeiru ami aprezenta ami nia efetivu no ami nia dispositivu forsa nian. Segundu ami aprezenta ami nia estrutura, terceiru ami aprezenta ami nia difikuldade li-liu kona ba infrastrutura”, dehan Lere.

Lere fo hatene katak Quartel Geral F-FDTL nian oras ne’e nudar Quartel nebe ba dala tolu ka laiha kondisoens nebe nebe favorese ba sira nia servisu.

Alem de aprezenta difikuldade kona ba infrastrtura, tuir Lere katak sira mos koalia kona ba reformasaun ba veteranu sira. Kona ba reformasaun veteranu sira nian, Lere hateten ba SED, Julio Tomas Pinto atu governu presiza kria kondisaun ba veteranus sira nebe mak reforma ka fila ba vida sivil.

Kona ba instituisaubnF-FDTL rasik iha ona koordenasaun ho veteranus sira nebe mak atu reforma, tuir Lere katak tanba ne’e mak planu sira nian hamosu ona forsa 2020 para preve ida ne’e, atu halo oinsa para forsa ne’e bele sai profesional, no nudar exersitu ida nebe profesional.

Atu preve hotu kestaun hirak ne’e, tuir Lere katak rekrutamentu oin mai sira nia parte sei hare, tanba lei servisu militar nebe obrigatoriu sem duvida sei iha kapasitasaun ba forsa.

Tanba ne’e tuir informasaun Lere katak governu foun oras ne’e dadaun hahu ona prepara fatin iha Fatuhada neba hodi hari Quartel Geral F-FDTL nian.

Durante enkontru ne’e mos Lere fo hatene katak sira nia parte ne’e mos aprezenta nafatin atu hari bairu militar, atu nune’e bele fasilita forsa sira bele besik ho familia, tanba se fora ida ho vensimentu ki’ik-oan, depois fim de semana husi Lospalos ba to’o iha Maliana ka Suai neba difisil atu fila lalais tanba distansia dok.

Alem de ne’e husi konfirmasaun Chefe Seksaun Pessoal F-FDTL, Major Ular katakpreukupasaun bo’ot ba seksaun pessoal nian mak tanba oras ne’e militak seidauk iha ema ida nebe formadu kona ba lei hanesan advogadu ruma, entaun ho prezensa ida ne’e sei husu ba estadu atu bele karik rekruta mos ema sivil ruma para halo servisu kona ba hare lei disciplina nian.

“Ami presiza ema ida nebe formadu kona ba advogadu ruma husi sivil nian nebe servisu mos iha ne’e, porque ami seidauk iha ema militar formadu ba ida ne’e, entaun ita bele mos rekruta sivil mai iha para halo servisu ba actividade lei servisu nian,”Ular hateten.

Entertantu parte Sentru Instrusaun F-FDTL Metinaro tuir deklarasaun chefe Departementu Logistic, Major Amico durante enkontru ho SED, Julio Tomas Pinto, aprezenta katak to’o oras ne’e sira preukupa liu mak falta material administrasaun nian la sufsiente ba instituisaun F-FDTL, hanesan mos falta kazernas.

Tanba tuir Amico katak, tuir lolos kazernas ba ofisiais, sarjento, instrutores, praças no forsa sira nebe rekruta foun lolos tuir kriteria tenki keetak-ketak,maibe to’o oras ne’e seidauk sufisiente ba forsa sira iha Metinaro nian.

Sira mos falta transporte katak governu durante ne’e simu doasaun husi transporte husi Malaysia, Portugal, Korea, Australia no Cina, maibe manutensaun durante ne’e lao ladun diak. Kareta husi Portugal oras ne’e atu halo lelan tiha maibe seidauk realiza, entaun kareta hirak ne’e hadau malun iha sentru instrusaun Metinaro.

Durante ekontru ne’e tuir deklarasaun Major Amico nian mos kestiona kona ba faltas elementus forsa nian nebe iha koñesementu kona mediku, maske oras ne’e balun mak haruka ba eskola ona iha Kuba.

Tanba ne’e maka Major Amico mos kestiona kona ba fatin servisu nian kona mediku sira nian mos la sufsiente atu loron ruma mediku F-FDTL nian fila mai karik mos fatin la sufsiente atu sira uza hodi halao servisu.

Vensimentu Subsidiu
Soldadu F-FDTL sira iha fulan Julho no Agostu lalais rezeita lakohi simu vensimentu tanba banku kua sira nia salariu subsidiu sem justifikasaun husi banku.

Tuir klarifikasaun husi Chefe Seksaun Pessoal, Major Ular Rihik bainhira dada lian ho Timor Post, (Kuarta 29/08) iha Quartel Geral F-FDTL Taci-Tolu katak depois hetan tiha justifikasaun husi Vice Ministra Plano Finanças, Aicha Bassarewan momentu neba, mak elementu F-FDTL sira foin simu sira nia vensimentu.

Entaun ho nune’e tuir Ular katak, nia rasik mak trava tiha, wainhira hetan tiha justifikasaun mak forsa sira foin bele simu sira vensimentu. Tuir Ular katak momentu neba nia rasik duni mak lakohi asina cek hodi haruka ba banku atu halo pagamentu.

“Entaun momentu ne’e mak trava duni, enkuantu hau ba hasoru Vice Ministra Finança nian kona ba pelu-menus tenki fo dokumentus ba ami terenu ne’e ami tenki ba klarifika bazeia husi baze legais mak ba. Sem ida ne’e hau labele asina cek hodi foti osan. Tanba li-liu ami iha terenu ne’e mak sei infrenta problemas oi-oin iha forsa nia klaran,” dehan Ular hodi esplika.

Liutan husi konfirmasaun Ular nian katak problema ne’e rezolvidu ona to’o bainhira Tenente Coronel Meno Paixão fila husi lisensa a hasoru direitamente PM Estanislau da Silva momentu neba hodi halo despaço.

Ho nune’e mak iha konfirmasaun Ular katak, tuir informasaun nebe sira simu ona husi PM actual Xanana Gusmão atu Setembru ne’e mak sei elabora fali hodi simu hotu subsidiu nebe koa tiha.(btp)