DILI, TP.

Dili, Instituisaun F-FDTL sei rekruta soldadu foun hamutuk 600 iha terseiru trimestre 2008, nebe sei hahu ho ema 300 deit.

Informasaun ne’e hato’o husi chefe treinamentu sentru Instrusaun Metinaro, Major Santos, ba Timor Post foin lalais, bainhira simu simu vizita kortezia Sekretariu do Estadu Defeza, Julio Tomas Pinto iha Metinaro.

“Planu nebe ke aprovadu tiha ona iha governu nebe ke hare rekrutamentu foun iha 2008 preve katak terseiru trimestre do ano 2008 parese ami rekruta iha primeira faze 300, depois de 300 ne’e ami rekruta hotu tiha, mak ami rekruta tan fali 300 hodi halo kompleta tina ida nia laran, ami bele rekruta 600,” dehan Major Santos.

Husi total 600 soldadu foun nebe sei rekruta ne’e, tuir Santos katak remata tiha treinamentu baziku no operasional mak foin bele hare ida-idak nia espesialidade atu koloka iha unidade ka bataliaun nebe mak presiza.

“Treinamentu operasional bainhira hotu tiha mak ita foin kaer sira nia areas idak nia nia espesialidade mak ita foin koloka sei ema iha espesialidade iha primeiru iha bataliaun laiha, ita tenki manda fali nia ba primeiru bataliaun. Tanba ita hare husi individuais ida-idak nia espesialidade”, tenik nia.

Kona ba total membrus F-FDTL hirak mak toma konta iha sentru instrusaun Metinaro, Major Santos dehan katak ema nain 120, nebe nain 40 ba tuir kursu iha Amerika, Brazil, Australia no China, no agora ofisiais iha sentru instrusaun hamutuk nain 80.

Sira hirak nebe mak tama iha estrutura sentru nian mak hanesan Direitur Sentru Instrusaun mak Tenente Koronel, Sabica Besi Kulit, Segundu Komandante Major Rai Ria, Chefe Operasional Major Rizai, Chefe Departementi Treinu Major Santos, Komandante Primeiru Kompañia Instrutores Kapitaun Izaias, Komandante Segundu Kompañia Instrutores Kapitaun Corterial, Komandante Terseiru Kompañia Instrutores Kapitaun Evoinio, Komandante Pelitaun Tiru, Alferes Denasio, Komandante Formador lian Portugues, Alferes Jacinto no Komandante Pelitaun Treinu Fiziku, Alferes Nuguerria.