DILI, TP.

DILI – Instituisaun Falintil Forsa Defeza Timor Leste (F-FDTL) lakohi hare tan povu terus nafatin iha volensia maibe, tenki moris iha prosesu dezenvovimentu ba futuru nasaun nia diak.

“Ita lakohi nasaun ne’e monu, tenki iha dezenvolvimentu iha futuru atu ita nia ona ka jovem sira bele moris diak, laos moris nafatin iha violensia nia laran,” dehan komandante Brigadeiru General Taur Matan Ruak ba jurnalista, Quarta(29/08) hafoin hasoru malu ho prezidente Horta, iha Palacio das Cinzas, Kaikoli, Dili.

Kona ba seguransa iha parte leste, Taur dehan, situasaun Lautem, Viqueque no Baucau komesa lao diak ona se kompara ho antes.

”Oras ne’e seguransa lao diak uitoan se ita kompara ho semana ida liu ba,” tenik nia.
Nia esplika katak, misaun F-FDTL atu kontaktu hodi hakalma situasaun, laiha misaun seluk, nebe lahanesan ho misaun PNTL, UNPOL no FSI nian.

F-FDTL koloka soldadu nain hitu(7) maka iha Lautem, no nain sanulu resin ida(11)iha Viqueque. Entertantu iha Baucau ne’e la determina numeru tanba quartel F-DTL ida mak besik iha neba.

Brigadeiru informa mos katak grupu ki’ik oan ida husi F-FDTL mos sai intermediariu kona ba oinsa atu servisu hamutuk hodi komunidade bele hari paz. Tanba tuir nia katak, paz labele forsa deit mak kria maibe tenki iha kolaborasaun husi komunidade.”Ne’e servisu ida ke kolitivu, komunidade tomak atu ida ne’e bele intende importansia paz nian, tanba paz iha mak iha dezenvolvimentu, dezenvolvmentu iha ita bele moris diak, se lae ita tama iha siklu ida la kontenti no hirus,” komandante Taur hateten.

Nia mos la determina tempu kona ba kolokasaun soldadu F-FDTLhalo seguransa iha parte leste.
Iha parte seluk, komande F-FDTL ne’e fo hanoin mos timor oan sira kona ba importansia loron selebrasaun loron referendum 30 de Agostu foin dadauk ne’e.

Tuir Brigadeiru Taur katak 30 de Agostu hanesan loron historiku nebe povu timor leste hakotu sofrementu iha tempu okupasaun Indonesia, no importante teb-tebes ba loron ida ne’e tenki sai hanesan loron ida nebe halo refleksaun ba futuru.

“Loron ida ne’e loron ida nebe tenki sai hanesan loron ita halo ba futuru, ita hakarak Timor ne’e sai oinsa? Ne’e buat ida importante atu ita labe loron kalan konsentra deit atensaun ba halo nusa mak ma sunu uma, halo nusa mak ema tuda malu iha estrada laran, halo nusa mak hadia fizika para tuda malu,”dehan komandante F-FDTL.

Tuir nia hateten, to’o ona tempu atu Timor ne’e lao ba oin, katak iha tempu ne’e tenki hadia oan sira no kompozisaun cidade Dili nian.(Sar)