DILI, TP.
Dili, Timor Post,
20/09/2007
Dili – Tribunal District Dili, Kinta(20/09)ne’e
hahu halao primeiru julgamentu ba arguidu nain rua
husi nain 12 membru F-FDTL nebe hetan akuzasaun
tiru mate membru PNTL nain 8 iha edifisiu Ministeriu
Justisa nia oin, loron 15 Maiu 2006.
Arguidu nain rua ne’e mak hanesan kapitaun
RGC, tinan 35, no soldadu NM, tinan 28. Entretantu
arguidu nain 10 seluk inklui membru PNTL nain ida,
sei tuir julgamentu loron tuir mai.
Prokurador Dra. Zelia Trindade, Dr. Felismino Cardoso,
no Dr. Bernardo Fernandes iha julgamentu ne’e
le surat akuzasaun katak hahalok arguidu na’in
12 durante loron 23, 24, to’o 25 Maiu 2006
ne’e kontra lei tuir Kodigu Penal artigu 53
alinea 1, no artigu 338 KPP kona ba omesidu (oho)
no akuza mos ho artigu 115 KPP tenta atu oho.
Arguidu RGC, iha julgamentu nebe halao iha edifisiu
Tribunal Rekursu Kaikoli, Dili ne’e deklara
katak, iha momentu neba sira F-FDTL mak uza kilat
modelu M-16 tiru hasoru membru PNTL nebe forma husi
Kuartel PNTL Kaikoli mai iha diresaun Ministeriu
Justisa nia oin. Tuir nia hare, mais ou menus soldadu
nain lima hanesan ne’e uza kilat iha Estrada
nebe membru PNTL sira atu liu, maibe nia lahatene
los se mak tiru.
Arguidu konfesa liutan katak, antes F-FDTL tiru
hasoru PNTL hirak ne’e, iha membru PNTL balun
tiru ho kilat bo’ot husi diresaun Kuartel
PNTL nian hodi hamate uluk komandante F-FDTL, Ricardo
Bure.
“Tanba iha ami nia komandante Bure mak mate
ona, tan hetan tiru husi membru PNTL balun, entaun
ami triste no emosaun hodi tiru hasoru fali sira,”
konfesa arguidu ne’e ba juiz Dr. Ivo Rosa,
Dr. Antonio Gonçalves, no Dr. Victor Hugo
Pardal, nebe lidera prosesu julgamentu ne’e.
Arguidu iha ninia depoitmentus katak hafoin rona
tiha tiruteus ne’e, arguidu RGC mai kedas
iha fatin akontesimentu, lori mos kilat M16, A2,
no kilat musan karegador 2, hodi fo ordem atu soldadu
sira bele hapara tiruteus ne’e. Sira konsege
hapara duni, maibe arguidu nebe refere laiha inisiativu
no lahetan ordem husi parte ruma atu tiru hasoru
PNTL.
Entertantu arguidu NM husi nain 12 nebe akompanha
husi advogadu Tommy Zeronimo, Jose Guterres, arlindo
Dias Sanches fo nia deklarasaun kuaze atu hanesan
ho deklarasun RGC nian. Nia hateten kuaze tuku 10.00
dader bainhira nia sei iha Kuartel F-FDTL, no soldadu
F-FDTL mos responde ba tiruteus ne’e.
Hafoin ne’e arguidu hakat kedas ba fatin
akontesimentu, no hare mos membru PNTL nebe ho kondisaun
formadu lao mai diresaun MJ nian, iha momentu neba
nia rona mos kilat tarutu maibe lahetan kilat tarutu
ne’e se mak tiru.
Tanba hare katak iha membru PNTL balun monu tanba
hetan ona tiru husi F-FDTL sira, entaun arguidu
nain rua nebe hato’o uluk deklarasaun ne’e
haruka tiha soldadu seluk atu labele tiru ona.
Tuir observasaun Diario ba prosesu julgamentu lao
sériu duni, nebe hetan mos partisipasaun
husi familia arguidu, vitima no membru F-FDTL inlkui
PNTL balun no Polisia Nasoes Unidas sira.
Alem de membru F-FDTLhirak ne’e partisipa
area Tribunal Rekursu hetan seguransa maximu husi
membru F-FDTL no mos PNTL nebe taka netik dalan,
atu motor no kareta labele liu husi diresaun Tribunal
nia oin.
Entertantu juiz nebe lidera julgamentu ne’e
desidi atu julgamentu ba arguidu sira seluk sei
kontinua ba Segunda Feria loron 24 Setembru 2007
mai.
